Azerbaycan PL novbeti turu

[Admin]

Son Azərbaycan çempionunun çətin oyunları da məhz bununla başlayır. “Neftçi” üçün qarşılaşma turnir cədvəli baxımdan mühüm əhəmiyyət daşımasa da, hər halda, “Xəzər-Lənkəran” üzərində qazandığı qələbə ilə (2:1) imicini qorudu. Bu mənada “İnter”lə görüşdə də flaqmanın nəticəyə oynayacağı şübhə doğurmur. Üstəlik, paytaxt təmsilçiləri arasındakı oyunlar da prinsipial əhəmiyyət daşıyıb, həmişə gərgin və maraqlı mübarizə şəraitində keçib.

“Neftçi” ilk dövrədə məhz “İnter”ə məğlubiyyətdən (1:3) sonra heyətlə bağlı ciddi islahatlar apardı. Zirvədən gözünü çəkməyərək, “İnter”in büdrəməsini gözləyən “Bakı”nın da bu turda işi asan olmayacaq. Makedoniyalı mütəxəssis Qyoko Hacıyevskinin komandasımı Lənkəranda çətin sınaq gözləyir. Düzdür, “Bakı” bir ay öncə ölkə kubokunda “Xəzər-Lənkəran”ı səfərdə məğlub edə və iki oyunun nəticəsinə görə rəqibini mübarizədən kənarlaşdıra bildi. Bu baxımdan bakılılar ilk növbədə psixoloji baxımdan üstün durumdadır. Ancaq təbii ki, “Xəzər-Lənkəran” da qisas almaq üçün alışıb yanır.

Bu turda mükafatlarla yanaşı, Premyer Liqada qalmaq uğrunda mübarizə baxımından da vacib oyun olacaq. Təbii ki, söhbət “Bakılı” – “Turan” görüşündən gedir. Autsayderlər qrupunda yer alan hər iki komanda birinci diviziona düşməmək uğrunda amansız mübarizə aparırlar. Bu mənada “Bakılı” ilə “Turan”ın öz aralarındakı oyunda bir çox mətləblərə aydınlıq gələcək. Tovuzlular ötən tur evdə “Karvan” üzərində qazandığı böyük hesablı qələbə (4:0) sayəsində “Bakılı”nı turnir cədvəlində qabaqladı. “Turan”a ən yaxın izləyicisi ilə səfər oyununda ilk baxışdan heç-heçə yetərli olsa da, komanda Bakıya qələbə dalınca gəlir. Hər halda, tovuzlular “Bakılı”nı məğlub edəcəyi halda, Premyer Liqada qalmaq vəzifəsini sona 4 tur qalmış böyük ölçüdə həll etmiş olacaq.